Մանկաբարձությունում և գինեկոլոգիայում արդիական բուժական մեթոդների կիրառման հիմնախնդիրները՝ երևանյան միջազգային գիտաժողովում

«Մենք ուզում ենք, որ մեր բոլոր չափորոշիչները նմանվեն եվրոպականին, այդ իսկ պատճառով այսօրվա գիտական կոնֆերանսը նվիրված է հենց այդ ոլորտներում բուժական մեթոդներին»,- Ռազմիկ Աբրահամյան:

Երևանում անցկացվեց միջազգային գիտաժողով՝ նվիրված մանկաբարձությունում և գինեկոլոգիայում արդիական բուժական մեթոդների կիրառմանը: Աշխարհի տարբեր ծայրերից ժամանած բժիշկները հայ մասնագետների հետ միասին քննարկեցին ոլորտի ժամանակակից միտումները: Գիտաժողովը կազմակերպվել էր ՀՀ առողջապահության նախարարության, Մխ. Հերացու անվան պետական բժշկական համալսարանի,Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի, ՀՀ մանկաբարձ-գինեկոլոգների և նեոնատոլոգների ասոցիացիայի համատեղ ուժերով:

Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի տնօրեն, Առողջապահության նախարարության գլխավոր մանկաբարձ-գինեկոլոգ Ռազմիկ Աբրահամյանը ևս նկատեց, որ մեր երկրում մանկաբարձությունը և գինեկոլոգիան համարվում են գերակա ուղղություններ: «Հաշվի առնելով դա՝ մենք ուզում ենք, որ մեր բոլոր չափորոշիչները նմանվեն եվրոպականին, այդ իսկ պատճառով այսօրվա գիտական կոնֆերանսը նվիրված է հենց այդ ոլորտներում բուժական մեթոդներին: Հրավիրված են Եվրոպայից ամենաառաջատար մասնագետները, ովքեր Մանկաբարձ-գինեկոլոգների համաշխարհային ասոցիացիայի անդամներ են»,- նշեց պրոֆեսորը: Նա նաև տեղեկացրեց, որ գիտաժողովի տեսական հատվածից բացի, արտասահմանից ժամանած հյուրերը երկու օր կատարելու են վիրահատություններ՝ որպես վարպետության դասեր:

Վերարտադրողական առողջության, պերինատալոգիայի, մանկաբարձության և գինեկոլոգիայի հանրապետական ինստիտուտի փոխտնօրեն Արմեն Բլբուլյանը «Մեդ Պրակտիկ»-ի հետ զրույցում նշեց, որ մանկաբարձությանը և գինեկոլոգիային նվիրված երկրորդ միջազգային գիտաժողովի հիմնական շեշտադրումը բուժական մեթոդներն են. «Անցած տարի մեր գիտաժողովը նվիրված էր առհասարակ պերինատոլոգիայի ժամանակակից մոտեցումներին. այս տարի ավելի ընդգծել ենք վիրահատական մեթոդները: Մեր հանդիպումը կազմակերպված է բարձր մակարդակով, ինչպես վայել է միջազգային գիտաժողովին: Սա մեզ համար մեծ պատիվ է ու հնարավորություն: Մեր հրավերով Երևանում է համաշխարհային ճանաչում ունեցող Մայքլ Սթարքը, ում մեթոդով արդեն 20-25 տարի կեսարյան հատումներ են կատարվում աշխարհի տարբեր երկրներում: Այս ոլորտում վերջին խոսքը նրանն է, և այսօր այդ հրաշք մարդը մեր հյուրն է: Ունենք հյուրեր Անգլիայից, Իտալիայից, ովքեր ներկայացրեցին իրենց փորձը: Ներկայացվեցին նաև առաջատար դեղագործական ընկերությունների դեղամիջոցները: Մենք ընդգրկել ենք նաև շատ երիտասարդների, այդ թվում՝ հանրապետության հեռավոր շրջաններից մասնագետների, ովքեր հատկապես ունեն այս շփման կարիքը: Կարծում եմ, որ բժշկությունը Հայաստանում այն ոլորտներից է, որտեղ մենք, բարեբախտաբար, կանգ չենք առել, առաջ ենք գնում, զարգանում ենք»:

ՀՀ առողջապահության փոխնախարար Վահան Պողոսյանն ընդգծեց, որ ոլորտը գտնվում է նախարարության ուշադրության կենտրոնում. «Սա հերթական գիտաժողովն է, որի նպատակը մասնագիտական խնդիրները, ժամանակակից մոտեցումները քննարկելն է: Հրավիրվել են առաջատար մասնագետներ, ովքեր փորձի փոխանակում կունենան տեղի մասնագետների հետ»:

Գիտաժողովի արտասահմանցի մասնակիցները ևս մեծ ոգևորությամբ էին վերաբերվում իրենց հայաստանյան այցին: Մեզ հետ զրույցում իտալացի Մարիանո Յակարինոն նշեց, որ պատրաստ է երիտասարդներին փոխանցել այս ոլորտում երկար տարիներ կուտակած իր փորձը: Նա նաև նկատեց, որ Հայաստանում ոլորտը բավականին զարգացած է, նորագույն տեխնոլոգիաներն էլ աստիճանաբար ներդրվում են:

Գիտաժողովին իրենց արտադրանքն էին ներկայացնում առաջատար դեղագործական ընկերությունները: «Մեդ Պրակտիկ»-ի հետ զրույցում «Շտադա» դեղագործական ընկերության բժշկական ներկայացուցիչ Արփինե Մարջանյանը մեծապես կարևորեց նմանատիպ գիտաժողովներին մասնակցությունը.

«Այսօր ներկայացնում ենք մեր նոր դեղամիջոցը՝ «Տրանեկսամ»-ը: Այն արյունականգ միջոց է, որը լայնորեն կիրառվում է բժշկության շատ ոլորտներում, այդ թվում ՝ գինեկոլոգիայում: Եվս մեկ նորություն ունենք՝ «Ֆեմիլեքս» մոմիկները (Femilex), որոնք պարունակում են կաթնաթթու՝ բուժական դոզայով, և կիրառվում են բակտերիալ վագինոզի բուժման ժամանակ: «Ֆեմիլեքս»-ն օգտագործվում է տասնօրյա կուրսով, օրը՝ մեկ մոմիկ:

Նորությունների շարքում ներկայացնում ենք նաև «Գինեպրիստոն»-ը (Gynepriston), որը հրատապ հակաբեղմնավորման նպատակով է կիրառվում: Բավականին արդյունավետ, ոչ հորմոնալ դեղամիջոց է:

Մեր պորտֆելում գինեկոլոգիայում կիրառվող դեղամիջոցները կազմում են մոտավորապես երեսունհինգ տոկոսը. պլանավորում ենք ընդլայնել այդ շարքը, մեծ ծրագրեր ունենք գինեկոլոգիայի և մանկաբարձության ոլորտներում: Կունենանք նոր դեղեր, որոնք իրենց պրակտիկայում կկիրառեն մեր բժիշկները և կունենան գոհացուցիչ արդյունքներ: Շատ է ուրախացնում այն փաստը, որ մեզ հետ համագործակցող բոլոր բժիշկներից լսում ենք միայն դրական կարծիքներ: «Շտադա» դեղագործական ընկերության հայաստանյան ներկայացուցչության հիմնական քաղաքականությունն է՝ որակյալ դեղամիջոցներ՝ մատչելի գներով»:

Հարցեր, պատասխաններ, մեկնաբանություններ